بيتزا سهلة وسريعة بالصور

المقادير (اللى هقولها تكفى عمل صينيه و لو عايزه زياده ضاعفى المقادير )

كوبايه و نصف دقيق

نص كوبايه ميه دافئ

معلقه خميره بودر

رشه ملح و رشه سكر

زعتر و ريحان مطحون بيدوا طعم خطير للبيتزا

مقادير صوص المنزلزا

فص ثوم مفروم

معلقه صلصة

معلقه كاتشاب

معلقه زيت

ملح

كمون

ريحان

زعتر

شويه مية

شويه زيت صغيرين


الطريقة

اولا العجينة

نخلط الدقيق مع المكونات الجافه (الملح السكر الزعتر الريحان الخميره )

ثم نضيف الميه و شويه زيت صغيرين جدا جدا و نعجن كويس اوى بالعجانه او بادينا و لحد ما لعجينه تبقى ما بتلزقش معاكي

لو لقتيها بتلزق ضيفى لها شويه دقيق

ونسيب العجين يخمر على جنب

خلال ما لعجين بيتخمر

نوضب الحشوه بتاعه المنزلزا


طماطم و فلفل اخضر و بصل متقطعين قطع صغيرة

وزيتون مخلى بس انا ما كانش عندى مخلى فقطعتة عادي

وممكن تحطوا مشروم انا بحبة جدا جدا بس نسيت احط منة المره دى مع انه كان عندييا سلام

وممكن اي نوع بقى لحوم سوسيس بسطرمه فراخ تونه انشوجه اي حاجه بتحبيها انا ضيفت سوسيس

وجبنه بالتاكيد يمكن تركى (رومي) او موتزاريلا بس انا يومها ما كانش عندى متزاريلا فحطيت تركي


و نجهز كمان الصوص بتاع المنزلزا

المكونات اللى قولتها بنخلطها كلها مع بعض سهل جدا جدا و طعمة جميل

والريحان و الزعتر و بيدوا طعم جميل عشان كده انا بحب اضيفهم للعجينه و الصوص

بعد ما نخلص تجهيز مكونات المنزلزا هتكون العجينه خمرت و بقت زى الفل

هنجيب صنيه و ندهنها زيت بسيط جدا جدا جدا

ونجيب العجينه نفردها كويس فالنصيه و ثم نضيف الصوص بتاع المنزلزا

ولو لقيتى كميه الصوص كتير ما تحطيهوش كلة بس انا بصراحه حطيتة كلة و كان جميل

بعد كده نحط السوسى و بعدية الخضار الطماطم و الفلفل و الزيتون و البصل

وندخلها الفرن قبل ما تطلعيها من الفرن ضيفى لها الجبنه سواء تركى و ا موتزاريلا

انا بحب الجبنه كتير بها بس للاسف ما كترتش عشان الجبنه كانت حادقه اوي

وبكده تكون جاهزه انا عملت جنبها بطاطس محمره و سلطه كول سلو و بالتاكيد الكاتشب و الهوت صوص


و بالف هنا و شفا

يارب تعجبكم