صورة-1
بحبك يا مصر ..
وبعشق ترابك .
والف المداين ..
وارجع لبابك .
واحس بكياني ..
وكرامتي في رحابك .
يقولوا فقيرة ..
يقولوا اسيرة ..
بشوفك اميرة ..
واحبك يا مصر .
بحبك ملاية .. و منديل بقويا .
مقالب من اختي .. و غتاتة من اخويا .
ودعوة من امي .. تنسيني همي ..
وحكمة من ابويا.
واحبك بنوتة .. علي البحر جاية ..
في ساعه عصاري .
ونسمة قبالها .. تطير فشالها ..
تبين جمالها .. و ترجع تداري .
واحبك مراكب .. تعدي اللي راكب ..
لبر الامان .
يدوب جوا نيلك .. و يعطش يجيلك ..
يقوللك كمان .
واقابلك ببوسة .. فزفه عروسة ..
ولمة فبيتنا ..
مع و لاد حارتنا ..
تدق المزاهر .. ترد المزامر ..
تزغرد جارتنا .
نهلل .. نغني ..
وحلم التمني ..
ينور ليليتنا .
واحبك زيارة لبيت عم سيد ..
دة اصلة فقير مش حيقدر يعيد ..
نعيد علية .. نفرح عنية ..
ويدعيلنا دعوة بمليون جنية .
في ارضك يحس الغريب انه مصري ..
واحنا الاجانب .
ويلقي الرعاية .. و يلقي الحماية ..
علي جميع جانب .
ويمشي في ربوعك .. و يشبع بجوعك ..
ويعمل مصايب .
ويرحل و ينسي .. جميلك و يقسي ..
ويطلع يعايب .
ويرجع تسامحي .. يا ساكنة في ملامحي ..
يا ست الحبايب .
ولادك بنوكي .. بروحهم فدوكي ..
ويشهد عليهم ترابك فسينا .
ومنهم با عوكي .. عشان الشيروكي ..
وفيللا في ما رينا .
يعيشوا فخيرك .. و يدوة لغيرك ..
ولاد اللذينا .
ولو جار زمانهم .. يعودوا لمكانهم ..
يلاقوا السكينة .
وتنسي جحودهم .. و تبكي عليهم ..
عنيكي الحزينة .
في ارضك سرحت .. فشلت و نجحت ..
و عشت ببساطة .
صاحبت الحمام .. و نمت في سلام ..
ولو على البلاطة .
تغير فشكلي ..همومي و مشاكلي ..
لكن روحي لا .
اعبر بغنوة .. و اقول نكتة روعة ..
لكن ياس لا .
ما طيقش الغتاتة ..
وقلبي المسالم ما يعرف شماتة ..
واقول بالتلاتة ..
بحبك .. بحبك .. بحبك .. يا مصر