6:56 صباحًا الإثنين 27 مايو، 2019






رجيم اللقيمات منتدى فتكات

صور رجيم اللقيمات منتدى فتكات

ازيكم يا فتوكات مدمات و انسات و زهرات
[حابة النهاردة اهديلكم و اهدي لكل فتوكة طلبت مني الشرح الكامل لتجربتي في ريجيم اللقيمات لان الكتب او المراجع اللي عالنت كلها للقيمات بتلخبط شوية اي حد عاوز يبدا يطبق الريجيم و بيكون عاوز وقت كبير عشان يفهم و دة بردو حصلى في البداية و كنت افضل اسال نفسي انا كدة صح و لا غلطالمهم انا هقولكم تجربتي و أسأل الله العظيم ان فتوكات كتير يستفادو منها
و لان الحسد حق بتمني انكم تصلو على خير الانام سيدنا محمد و تقولو ما شاء الله البدايه

انا بدأت الريجيم و انا و زني 86 كجم
بدأت في 1-10 2019
و وصلت لوزن 67 في نص شهر فبراير
ملخص للريجيم قبل ما ادخل في التفاصيل عاوزاكو تعرفو اية هو اصلا اللقيمات
والكلام دة عامي من دماغي و دي خلاصة تجربتي و خبرتي مع الريجيم يعني مش كلام انشا ممل)

اللقيمات هو النظام النبوي اللي و صانا بية رسول الله صلى الله عليه و سلم دي اهم نقطة لازم تحطيها في دماغك قبل ما تبدأي اللقيمات انتي كدة بتستحضري النية باتباعك لرسول الله و بالتالي هتؤجري و هتخسى 2×1
و الحديث المشهور عن الرسول صل الله عليه و سلم
يقول صلى الله عليه و سلم
ما ملا ابن ادم و عاء شرا من بطنه.بحسب ابن ادم لقيمات يقمن صلبه،فإن كان لا بد فاعلا فثلث لطعامة و ثلث لشرابة و ثلث لنفسه
رواة الترمذي

اللقيمات هو نظام حياة بمعنى ان اللي بينوي يبدأة بيستمر فيه طول عمرة و دي حاجة هتكون لا ارادية بعد فترة لان هيحصل تعود على كمية اكل معينة بتدخل المعدة اول ما تاكليها بتلاقي نفسك خلاص مش قادرة تاخدي لقمة زياده

ودة اللي بيخلي كتير في المراجع بكتب ان بيثبت الوزن مش معناة انك توصلى لوزنك و بعدين ترجعي تاكلي زي زمان لا معناة انك طبيعتك هتتغير هتلاقي نفسك بتشبعي بسرعة فبالتالي مش هتزيدي في الوزن

طيب دلؤئتي السؤال اللي بيفرض نفسك يعني اية بقي اللقيمات و كيف ممكن نطبقه

ريجيم اللقيمات مش بيحدد نوعية الاكل و دة مهم في ان اي حد باى مستوي معي شي يقدر يطبقة لان نوعية الاكل مش هي الاساس , و لكن الاساس هو كمية الاكل
خليكو معايا …
نرجع للاجابة على سؤالنا كيف نطبق اللقيمات
في اليوم ليكي 5 لقيمات و وجبة مفرحة هابي ميل)

اللقيمات
اي نوع اكل في حجم تلت الكف

ودي امثلة

تفاحة – موزة برتقالة خيارية جزراية يعني اي ثمرة فاكهة او خضار و لو ثمرة نوعها صغير زي العنب مثلا تبقا حوالي ¾ كوب منها
ربع رغيف بجبنة قطعة بيتزا بحجم تلت الكف قطعة كيك بحجم تلت الكف او كرواسو قرص كعب غزال يعني اي حاجة بحجم تلت الكف
طيب ينفع مشروبات

 


ايوه طبعا اي كوب بيكون لقيمة يعني كوب نسكافية كوب عصير كوب شاي كوب لبن اي كوب لاي مشروب يعتبي لقيمه
طيب تمام كدة بالنسبة للحلويات و الشوكولاته؟؟
خلي بالكم انا بحكي تجربتي لان في ناس كتير كانت بتعارضني و انا بطبق اللقيمات لاني مثلا باكل قطعة شوكولاتة كلقيمة و يقولولي كدة مينفعش خلي لقيماتك صحية و وو

بص صدقوني انا كنت مقتنعة 100 بالكلام اللي الدكتور محمد الهاشمي بيقولوان نوعية الاكل مش مهمة المهم الحجم

وفعلا الحمد لله طبقتة و نجح معايا

افهمو من كدة ان ينفع اخد نص شوكولاتة سنيكرز كلقيمة او نص ما رس او واحدة شوكولاتة باونتي و هكذاااا
ممكن كمان قطعة جلاش حلو او كنافة فاهمنى؟)
خلاص نقطة اللقيمة كدة مفهومه:
نيجي بقا للهابي ميل و كيف كنت بعملها
الهابي ميل عبارة عن 3 حجات مهمة و اساسية

اولا طبق سلطة متوسط و عليه معلقة زيت زيتون

ثانيا
طبق يحتوي على طعام المنزل قسمية 3 اجزاء اول جزء 5 معالق نشويات ارز او مكرونة او بطاطس او ربع رغيف عيش .

 

(بعد فترة هتحسى ان 5 معالق كتير و ممكن تقللى)تاني جزء قطعة بروتين بحجم تلت الكف ربع فرخة صغيرة من غير جلد او قطعتين لحم احمر او سمكة او 2 بيضه)
تالت جزء لو موجود خضار مطبوخ مثلا فاصوليا خضرا ملوخية سبانخ ….. و خليهم معلقتين بس

ثالتا طبق يحتوي على قطعة حلويات بحجم علبة الكبريت يعني مكعب شوكولاتة قطعة جلاش صغننة سعات كنت باخد معلقة صغيرة شوكولاتة نوتيلا

طيب عرفنا اية هي اللقيمة و عرفنا كمان الهابي الميل
اليوم بيكون كالاتى

تصحي الصبح تاخدي كوبايتين ما ية عالريق و ممكن تلعبي شوية رياضة او اي حاجة في البيت سريعة يعني نص ساعة كدة بعد الماية و بعدين الصبح مسموح ليكي الصبح بس 2 لقيمة شوفتو الكرم بئا

يعني تاخدي مشروب و لقيمه
ممكن كوب شاي بلبن و معاة ربع رغيف بجبنة او ببيضه
اختاري اي مشروب و اي لقيمة انتي تحبيها
بعد ساعتين الى 3 ساعات في بداية الريجيم خليها ساعتين لان لسة المعدة مش و اخدة عالاحجام الصغيرة و بعد كدة ممكن نزود ل3 ساعات

المهم بعد ساعتين اشربي كوباية ما ية و بعدين لقيمه
بعد ساعتين تاني ممكن الهابي ميل او لقيمة على حسب كل واحدة و يومها بيمشي كيف و بتتغدي امتى

لو هابي ميل يبقي قبلها بساعة خدي 3 لوزات او 5 سودانيات و امضغيهم كويس اوي و بشويش لحد ما ينعمو اوي و بعد نص ساعة تاني خدي 3لوزات او 5 سودانيات و بعد نص ساعة كلي الهابي ميل عادى
بس مهم اوي انك متشربيش ما ية ابدا بعد اللوز او السودانى
اهمية اللوز او السوداني انه بينشط منطقة الشبع في المعدة لان الطعام الصلب بيبقي في المعدة مدة طويلة و اللوز او السوداني طعام صلب فبينشط منطقة الشبع – نقطة الهاشمي للشبع و دي اكتشفها دكتور محمد الهاشمي و الفايدة بئا انك تحسى بالشبع بسرعة و معدتك متكونش اتملت بالاكل و تنشيط المنطقة دي بتخليكي تعرفي امتى تشبعي شبع حقيقي مش مجرد ملي للبطن و انك تخلصي الطبق اللي قدامك و بس

طيب خلاص كدة خلصنا اللوز و الوجبة المفرحه

بعد 3 ساعات بتكملي لقيماتك عادي جدا

المهم ليكي 5 لقيمات و وجبة مفرحة مش مهم و قتهم امتى و لا مين قبل مين اوك

اسئلة مهمه

شرب الماية معادو بيكون امتى؟
قبل اللقيمات او قبل اكل اللوز قبل الوجبة المفرحه
و بعد اللقيمة او الهابي ميل بنص ساعة على الاقل مش قبل كده
يعني مفيش ما ية في و سط الاكل او بعد الاكل مباشره
و السبب ان الاكل الصلب بيفضل في المعدة فترة طويلة و بتحسى بالشبع فترة اطول لكن لو شربتي ما ية في و سط او بعد الاكل هيكون الطعام في المعدة اتحول لشبة سائل بالتالي مش هيبقي في المعدة فترة طويلة و بالتالي فترة الشبع هتقل

معاد الهابي ميل ممكن يكون بليل

 

مفيش اي مشكلة في معاد الهابي ميل الكلام دة انا سمعتة من الدكتور محمد الهاشمي نفسة في فيديو لية مع دعاء عامر)
ممكن نستبدل اللوز او السوداني باي مكسرات او اكل تاني

 

لا اللوز او السوداني بس فقط لا غير مينفعش اي حاجة تحل محلهم في ايام مكنش بيكون عندي و لا لوز و لا سوداني فمكنتش باخد حاجة قبل الهابي ميل بشرب ما ية و بس}

اية هي البنفسجيات و اية فايدتها

 


البنفسجيات هي انواع من الفاكهة و الخضار زى:
الفراولة الكرنب البنفسجي الاراصيا الرمان التوت الزبيب الغامق البادنجان العنب الاسود الكريز
و دي ضرورية لفقدان الوزن و لازم تكترو منها و تاخدو منها لقيمات و دة كلام نقلا عن الدكتور محمد الهاشمي عليك كثرة تناول اللقيمات من الأنواع التي تحتوي على ما ده الانثو سيانين ،

 

لأنها من اقوى مضادات الأكسدة،

 

مشيرا الى انه اذا كان تلوث البيئه عامل اساسى في ضمور الدهون البنيه فإن تنشيطها سيكون باستخدام مضادات الأكسدة

والدهون البنية دي بتساعد على زيادة معدل الحرق و هي بقل نتيجة التلوث و اللي بيزودها البنفسجيات دى

اية لازمة الحلويات في الوجبة المفرحة

 

 

و هل ممكن الاستغناء عنها عشان نخس بسرعه؟

الحلوى في الوجبة المفرحة تشعر العقل بالسعادة و النشوه و بالتالي العقل هيشتغل بشكل جيد جدا و كمان هيعمل على ارسال اشارات لحرق الدهون لانك بتحققيلة رغباتة خلو بالكو يا فتوكات جسمكم زكي جدا و لازم تفهمة طلباتة و تحققيها عشان يبدا ينفذ اللي انتي عاوزاة مينفعش تحرمية و تعيشية في مجاعة هيرفض رغباتك في انك تخسى مش هيسمعلك اتعاملي معاة انو فاهمك و انتي افهمية مش بتسمعو بنات بتقول بعمل ريجيم بقالي شهر و حارمة نفسي من الاكل و جيت اوزن نفسي لاقيتني ثابتة

 

 

لان الجسم بيعند و بيجاف من المجاعة اللي انتي حطتية فيها و بالتالي بخزن اي جرام دهون بيدخلوو)

هل المشروبات بدون سكر تعتبر لقيمه

 

و كام معلقة سكر مسموح بيها في اليوم؟

لا المشروبات بدون سكر او لبن متعتبرش لقيمة يعني يانسون بدون سكر شاي بدون سكر نسكافية بلاك بدون سكر كل دة ميعتبرش لقيمه
امتى المشروب بيكون لقيمة لما تحطة عليه سكر او لبن او طبعا العصاير

وليكي في اليوم 5 معالق سكر توزعيهم زي ما نتي عاوزه
بس من خلال تجربتي حاولت على اد ما اقدر اقلل استهلاكي للسكر في المشروبات كنت بشرب كل حاجة 3 معالق زمان بدات اخليهم معلقة و نص لمدة اسبوع و لحد ما اتعودت على الطعم دة و بعدين خليتها معلقة و بعدين دلوئتي بشرب اي حاجة بنص معلقة او من غييير خالص
اية اخبار المكرونة بشاميل و المح شي و البيتزا في الوجبة المفرحه

اليوم اللي كنت بعمل فيه مكرونة بالبشاميل مثلا كنت باخد قطعة واحدة مربعة اد تلتين الكف كدة و معاها سلطه
و اليبتزا باخد شريحة بيتزا واحدة بردو معاها سلطه

والمحشي 5 صوابع على انهم النشويات و معاهم قطعة دجاج مثلا و سلطه[
بس كدة يا فتوكات عاوزة اقولكم بئا ان شرب الماية مهم جدا جدا جدا جداااااااا لانها بتساعد على انك تخسى بسرعة بصي اي حاجة بتتم في الجسم اي عملية حرق دهون اي تخلص من السموم و الدهون بتتم في وجود الماية فهي كمان ضرورية عشان لما تخسى باذن الله ميكونش عندك ترهل و لا شحوب
و كمان احنا طبعا بنقول انك تاكلي كل حاجه
بس عن تجربتي حاولت على ق ما اقدر اخلي اكلي قليل الدهون و صحي اكتر

يعني مفيش ما نع اكل بيتزا بس نص دقيق اسمر و نص ابيض

مفيش ما نع اكل مكرونة بشاميل بس البشاميل بعملة من غير دهون

بقلل الدهون في كل اكل بعملة بستخدم طاسات و حلل تيفال عشان ميلزقش الالكل و اقدر اقلل الدهون
الحمد لله انا و زني ثابت عند 67 بس رجعت استهبلت شوية لمدة شهرين و اكلت حلويات زيادة فوصلت ل70 بس الحمد لله ظبطت تاني و شوية رياضة دلوئتي انا 66 و نص و الحمد لله

  • ينفع عنب في الريجيم فتكات
  • تجارب ريجيم ناجحة فتكات
  • رجيم اللقيمات
  • الكبربت المكروني
  • منتدى فتكات ورجيم اللقيمات
  • منتدي فتكات ريجيم اللقيمات
1٬015 views

رجيم اللقيمات منتدى فتكات